Додека публиката со нетрпение го очекува првиот музички албум на младиот Јаков Јозиновиќ, неговиот успех веќе може да се мери и во заработка, иако кариерата му трае само неколку месеци.
Младиот регионален музички феномен не ги полни само концертните сали низ регионот, туку сериозно заработува и преку интернет. Неговиот вртоглав подем во последните месеци го потврдува и податокот дека преку платформата „Јутјуб“, според проценките на сервисот „Соушл Блејд“, досега можел да заработи и до 102 илјади долари од отворањето на каналот до денес.
Јозиновиќ го отворил својот канал на 1 ноември 2025 година, а оттогаш бележи експлозивен раст на прегледи, следбеници и слушаност.
Според проценките на специјализираниот сервис „Соушл Блејд“, неговата месечна заработка моментално се движи од околу 965 до дури 15 илјади долари, зависно од бројот на прегледи, активноста на публиката и популарноста на содржините.
Особено внимание привлекува фактот што токму две песни донеле најголем дел од прегледите и заработката — „Поле ружа“ и „Ја волим“. Поради тоа, Јозиновиќ денес се смета за еден од најисплатливите млади изведувачи на Балканот кога станува збор за дигиталните платформи.
Неговите снимки редовно се наоѓаат меѓу најпопуларните содржини, додека публиката масовно споделува видеа од настапите и емотивните интерпретации што му го донесоа статусот на едно од најголемите нови имиња на регионалната сцена.
Огромниот раст на публиката не останал само на интернет. Успехот на социјалните мрежи и „Јутјуб“ многу брзо се префрлил и на продажбата на концерти, каде младиот пејач постигнал резултати што ретко се гледаат на домашната сцена.
Публиката најпрво масовно го прифатила преку виралните обработки и емотивните настапи, а потоа следувале распродадени концерти и вистинска еуфорија за билети.
За кратко време успеал да изгради база на обожаватели кои го следат секој негов чекор, а многумина му предвидуваат кариера на најголемите регионални музички ѕвезди, иако има и такви што сè уште се сомневаат во тоа.
По серијата распродадени вечери во „Сава Центар“, дури десет концерти, Јозиновиќ направил нов голем чекор и закажал концерт во „Белградска арена“, а потоа и уште еден.
Медиумите низ регионот веќе го нарекуваат „музички феномен“, особено по големиот успех на турнејата „Јас за чуда летам“.
Со бројките што растат од ден на ден и заработката што се мери во десетици илјади евра, јасно е дека Јаков Јозиновиќ за многу кратко време стана едно од најбараните и најпрофитабилни млади имиња на регионалната музичка сцена.
