Легендарниот хрватски пејач Душко Локин сними нова песна „Маестрал“, на која е многу горд, особено затоа што ја снимил со својот српски колега Жељко Самарџиќ и вели: „И тој е секогаш дете“.
– Бидејќи Жељко е голема ѕвезда, а јас сум легенда, песната мора да биде полн погодок, ќе видите – рекол Душко Локин низ смеа за хрватски „24сата“.
Тој ја претстави новата музичка соработка со еден од најпопуларните пејачи во регионот, Жељко Самарџиќ. Заедно го снимиле дуетот наречен „Маестрал“.
– Многу ми е мило што Жељко и јас успеавме да ја снимиме песната. Знаете, Жељко е исто како мене – дете од Задар! Тој доаѓаше да ме слуша на концерти кога растеше во Задар. Исто така, еднаш победи на фестивал во 70-тите години со мојот голем хит „Дојди“. Сигурно се сеќавате на тие реплики: „Дојди, моето срце има потреба од тебе…“. Значи, навистина, ние сме одлични пријатели и јас на некаков начин останав во неговото срце, а може да се каже дека сега и тој влезе во моето срце – смеејќи се рекол легендарниот Локин.
Тој додава дека всушност станува збор за љубовна песна. Тој е убеден дека песната ќе биде голем успех.
Да потсетиме, Локин неодамна сними нов музички спот. Иако зад себе има повеќе од 50 години успешна кариера, музичарот од Задар не мирува и продолжува посветено да работи на задоволство на својата лојална публика.
Обожавателите биле воодушевени и од објавата на Младен Грдовиќ, кој објави видео на социјалните мрежи од Душко Локин како ја коси тревата.
– Мој драг Душко, 82 години. Сè уште ја коси тревата, а јас не знам ни сијалица да сменам – напишал Грдовиќ.
Тој потврдил и во разговорот за „24сата“ дека е здрав и во одлична форма.
– Формата мора да биде добра. Моите концерти во Хрватска и Словенија траат од три до четири часа. Го правиме тоа во едно парче, без пауза. А за тоа мора да издржите, никој освен нас не го прави тоа. Вистина е дека луѓето во мојот бенд се на возраст меѓу 40 и 50 години, па можеби им е малку полесно отколку мене – смеејќи се рекол Локин и додал дека во слободното време, освен со косење, се занимава со внуците, правнуците, градинарството и помагањето на пријателите.
