Концертот на групата Лајбах во украинската престолнина Киев, кој беше најавен за 31 март, е откажан.
Групата потврди дека организаторот го откажал концертот во неделата бидејќи најавата предизвикала премногу контроверзни реакции во Украина. Како што напиша и групата, од нив категорично било побарано да се изјаснат дека сите Руси се лоши и дека целата руска уметност е безвредна, со што, се разбира, тие не се согласиле.
Локалниот организатор на концертот на една од социјалните мрежи објави дека концертот е откажан поради жестока полемика за ставовите на групата за причините за војната во Украина.
„Со цел да се спречи непотребната поделба на Украинците во различни табори и да се елиминира причината за раздорот, решивме да го откажеме концертот“, објави организаторот на Фејсбук. Продажбата на билети за концертот е прекината и на веб-страницата концерт.уа.
Најавениот концерт на Лајбах во Киев претходно предизвика многу контроверзии на Фејсбук поради ставовите на бендот за причините за војната во Украина.
„Иако бендот покажа поддршка за Украина и Украинците и го осуди рускиот режим, голем дел од публиката категорично се спротивстави на доаѓањето на Лајбах“, објави Бел Етаџ мјузик хол во неделата на Фејсбук. Како што напишаа и тие, сега не е вистинско време за концерт.
