Министерството за надворешни работи на Русија воведе санкции против уште 100 канадски државјани како одговор на санкциите наметнати врз руските граѓани од страна на канадската влада.
На листата се најдоа и холивудскиот актер Џим Кери, познатата писателка Маргарет Атвуд, писателот и режисер Дејвид Безмозгис и актерката Кетрин Виник.
Руското Министерство за надворешни работи соопшти дека одлучило за новата рунда санкции „како одговор на практиката, спроведена од режимот на Џастин Трудо, за воведување санкции против руското раководство, политичари и парламентарци, претставници на бизнисот, експерти и новинари, културни личности“.
Руските санкции доаѓаат откако Канада најави нова рунда санкции за полициските истражители, обвинители и судии. Од почетокот на офанзивата во Украина на 24 февруари, Канада санкционираше повеќе од 1.400 поединци и ентитети во Русија, Украина и Белорусија.
