Верица Ракочевиќ е успешна жена, а зад тој успех стои голем труд. Познатата модна креаторка, за разлика од многумина денес, не заборавила дека вредната и работлива личност треба со тоа да се гордее, а не да се срами.
Таа во неодамнешно гостување на една телевизија раскажа што доживеала пред своето модно ателје во Белград.
Имено, досега не било познато дека Верица нема продавачки во својата продавница, ниту каква било помош, туку сите обврски ги извршува сама.
„Пред некој ден зедов метла бидејќи имаше многу лисја пред продавницата и почнав да чистам. Тогаш помина една збунета жена и ме праша: „Па добро, каде ви се продавачките?‘“ Јас ѝ реков: „Немам, јас сум продавачката“. Веројатно мислеше дека сум полудела. Само си замина понатаму“, раскажа Верица Ракочевиќ и додаде:
„А чувството кај мене – фантастично. Се вратив 40 години наназад, кога сама чистев, дизајнирав, продавав, ги одгледував децата. Во тој момент, луѓе, адреналинот ми скокна“, изјави Верица за телевизијата „Уна“.
Покрај тоа што верува во трудот, Верица Ракочевиќ е многу посветена и на здравата, но балансирана исхрана.
Иако внимава што јаде, смета дека не е добро целосно да се исфрлат месото и месните производи.
„Таткото на Вељко живее во Врдник и одгледува свињи, па сега уживаме со домашни производи. Готвиме и со маст, за која се покажа дека е многу поздрава од кое било масло. Со години готвев со масло од грозје, но откако почнавме да подготвуваме храна со маст, забележав дека садовите многу полесно се мијат и со многу помалку детергент. Можам само да замислам што им прават маслата на нашите крвни садови кога оставаат такви траги на садовите“, вели креаторката.
Откако внимава на исхраната, се труди да јаде исклучиво природна и органска храна, па и во 78. година изгледа одлично.
Се обидува да јаде разновидно, а често консумира јаткасти плодови како бадеми, лешници и ореви, кои се и богати со омега-3 масни киселини.
Сепак, со текот на времето исфрлила некои намирници од исхраната.
„Не јадам црн леб, ниту бел леб, не јадам ориз, бел шеќер, не јадам похувано, ниту сувомесни производи. Никогаш не запржувам зготвена храна. Јадам месо, но ретко. Многу јадам риба“, изјави Верица за телевизијата „Hype“.
Ужива во природата
Верица не живее во центарот на градот, туку ужива во природата на планината Авала – најблиската планина до Белград, позната по чистиот воздух.
„Можеби малку претерувам, тоа ми го вели и Вељко, сите ми го велат, малку сум премногу врзана за дворот. Ова не е никаков спектакуларен имот, но имам среќа што имам градинар кој ми помага сè да изгледа убаво. Морам да имам естетски критериуми, потребни се многу личен труд, финансии, а пред сè љубов“, изјави Верица неодамна за „Блиц“, истакнувајќи дека никогаш не би се вратила да живее во град.
