Британската пејачка Рита Ора, која има косовско потекло, беше домаќинка на годинашното доделување на европските музички награди на Ем-ти-ви во Манчестер. Таа беше добра пријателка и музичка соработничка со прерано починатиот Лијам Пејн, па ја искористи можноста да му оддаде почит на овој престижен настан.
Ора одвои момент за да го спомене пејачот кој неодамна почина, велејќи дека Лијам е една од најпосебните личности со кои имала чест да се запознае.
„Сакам да го искористам овој момент за да се сетам на некој кој беше од големо значење за нас, некој што неодамна го загубивме. Тој беше важен дел од светот на Ем-ти-ви, мојот свет, и верувам дека светот на многумина од вас, како и сите ние вечерва овде“, рекла таа.
„Тој го имаше најголемото срце и секогаш беше првата личност што се понуди да помогне на кој било начин, внесуваше толку многу радост во секоја соба во која влегуваше и остави таков белег на овој свет“, додала Рита Ора.
По нејзиното емотивно обраќање, на екранот беше прикажано видео посветена на Лијам, со црно-бели снимки и фотографии од неговиот живот и песната „Night Changes“ од „Уан дајрекшн“, која беше еден од неговите најпознати хитови. На екранот се појави и натпис: „Ем-ти-ви се сеќава на Лиам Пејн“.
Потсетуваме, Лијам Пејн загина трагично на 16 октомври 2024 година на 31-годишна возраст по несреќен пад од третиот кат во хотел во Буенос Аирес, Аргентина.
