Македонската пејачка Тамара Волческа од Гостивар имаше успешен настап во музичкото натпреварување „Ѕвездите на Гранд“ и обезбеди пласман во следната фаза.
Волческа доби шест од можните седум гласа од жирито, а единствено Кеба не ѝ даде поддршка. Членовите на жирито го пофалија нејзиниот вокал, сценската сигурност и начинот на кој ја пренесе емоцијата преку песните.
„Ти верувавме во сè што испеа“, беше еден од коментарите што ги доби по настапот, додека Дара Бубамара особено ја пофали бојата на нејзиниот глас.
За време на разговорот со жирито, Тамара откри дека активно се занимава со музика веќе четири години. Нејзиното досегашно искуство на македонската музичка сцена беше забележливо и за време на настапот, при кој покажа самоувереност и сигурно сценско присуство.
Со освоените шест гласа, гостиварката продолжува во следната фаза од натпреварувањето, а нејзин ментор ќе биде Александар Милиќ – Мили, со кого ќе се подготвува за следните настапи во „Ѕвездите на Гранд“.
