Хрватскиот пејач Тони Цетински смета дека Хрватска оваа година има сериозни шанси за победа на Евровизија, откако групата „Лелек“ со песната „Andromeda“ обезбеди пласман во големото финале во Виена.
Лелекот на „Лелек“ ја оживеа жената окована во синџири и осудена на страдање поради туѓи одлуки
Цетински, кој ја претставуваше Хрватска на Евровизија во 1994 година со песната „Nek’ ti bude ljubav sva“, изјави дека годинашниот настап на Хрватска бил внимателно осмислен и професионално изведен.
„Врвни визуелни ефекти, одличен светлосен дизајн и најважното – настапот беше отпеан сигурно и енергично. Мислам дека оваа година, ако политиката го дозволи тоа, би можеле заслужено да се бориме за победа на Евровизија“, изјавил Цетински за „Нет.хр“.
Според него, хрватскиот настап оваа година ги надминува рамките на класичен евровизиски перформанс.
„Мислам дека Хрватска оваа година има големи, можеби и најголеми шанси досега, Евровизија следната година да се одржи кај нас. А тогаш – нека ни е Господ напомош“, се пошегувал пејачот.
Цетински се осврнал и на останатите фаворити на натпреварот, посочувајќи дека Финска според него заслужено се вбројува меѓу главните кандидати за победа.
„Според мене, Италија малку потфрли, очекував повеќе. Србија има интересна и поинаква песна, поагресивна е и се издвојува“, оценил тој.
Пејачот додал и дека му е жал што црногорската претставничка Тамара Живковиќ не успеала да се пласира во финалето.
