Американскиот музичар Р. Кели е прогласен за виновен за серија сексуални прекршоци, вклучително и долгогодишно водење „систем“ на сексуална експлоатација на млади жени и деца, пренесува „Би-Би-Си“.
Пејачот се соочува со обвинувања од жртвите речиси две децении, но постојано ги негираше истите. Случаите беа земени многу „посериозно“ откако жртвите зборуваа за тоа во телевизиски интервјуа.
Девет жени и двајца мажи јавно прозбореа за сексуалното понижување и насилство што им го нанел пејачот, а судењето траеше пет и пол недели.
Поротата, по дводневна расправа, го прогласи Р. Кели за виновен за сите обвиненија со кои се соочува. Музичарот треба да биде осуден на 4 мај, а му се заканува неколку децениска казна.
Р. Кели е обвинет за искористување на славата и богатството за да ги намами жртвите. Тој им ветил дека ќе им помогне во нивната музичка кариера. Неколку жртви сведочеа дека биле малолетници кога станале жртви на сексуално злоставување.
Добитникот на Греми, чие вистинско име е Роберт Силвестер Кели, додека во судот се читала пресудата, според извештаите на странските медиуми, седел тивко на обвинителната клупа. Носел заштитна маска поради правилата за време на пандемијата на коронавирусот.
Оваа пресуда беше донесена дури 13 години откако Р. Кели беше ослободен од обвиненијата за детска порнографија на судење во Илиноис.
Американскиот музичар е еден од најистакнатите мажи на кои им се суди за сексуални престапи во рамките на движењето #MeToo.
