Пејачката Сузана Гавазова сподели радосна семејна вест, откривајќи дека нејзиниот сопруг Јасмин Курузовиц станал дедо, откако неговиот син Емил добил син.
Гавазова среќната вест ја објави на социјалните мрежи, каде што не ја криеше радоста по повод приновата во семејството.
„Ни дојде уште една голема радост!
Нашиот Емил, синот на Јасмин, доби син!
Среќата е неопислива, срцата ни се полни со љубов и благодарност. Имаме прекрасен повод за славење и заедно да ја прославиме оваа најубава вест.
Нека е жив, здрав и благословен, а на среќните родители им посакуваме безброј насмевки, љубов и незаборавни моменти со нивното мало богатство“, напиша Гавазова.
Сузана Гавазова и Јасмин Курузовиц со години се во складен брак и имаат две ќерки. Јасмин, пак, од претходниот брак го има синот Емил, кој сега за првпат стана татко.
Љубовната приказна на Гавазова и Курузовиц започнала по случајна средба кај нивниот сегашен кум. Во тоа време Јасмин живеел во Шведска, а пејачката во Македонија, па нивната врска најпрво се развивала преку телефонски пораки. По повторната средба, околу две години подоцна, започнале љубовна врска, која подоцна ја крунисале со брак.
Со најновата објава, семејството сподели уште еден среќен момент, а честитки за приновата пристигнаа од бројни пријатели, колеги и следбеници на пејачката.
