Глумецот Дени Мастерсон (44), кој го играше ликот на Стивен Хајд во легендарната серија „Луди седумдесетти“, деновиве е во центарот на вниманието. Обвинет е за три случаи на силување, пишува Си-ен-ен.
Бил уапсен во средата, но брзо пуштен бидејќи имал право на кауција од 3,3 милиони долари.
Станува збор за силувања кои наводно се случиле во периодот меѓу 2001 и 2003 година.
„Мастерсон е невин, уверени сме дека ќе биде ослободен кога сите докази конечно ќе излезат на виделина и сведоците ќе имаат прилика да сведочат“, порача неговиот адвокат Том Месерау.
Додал и дека глумецот и неговата сопруга се во целосен шок.
„Сепак се тешат дека на крај вистината ќе излезе на виделина. Луѓето што го познаваат господинот Мастерсон го знаат неговиот карактер и знаат дека сите обвиненија се лажни“, вели адвокатот.
Властите наведуваат дека глумецот е обвинет за силување на една 23-годишна жена во 2001 година, а потоа наводно силувал 28-годишна жена во април 2003 година и 23-годишна жена помеѓу октомври и декември истата година.
Сите наводни злосторства се случиле во куќата на Мастерсон во Холивуд хилс.
Судењето е на распоред на 18 септември, а ако се докаже вината, би можел да добие 45 години зад решетките. Исто така не е исклучена ни доживотна затворска казна.
