Пејачката Неда Украден, покрај примарната кариера, изнајмува луксузна вила во Имотски. Откако хрватските медиуми објавија дека нејзиниот имот зјае празен и дека ѝ пропаднал бизнисот со издавање, таа се огласи со јасна порака: „Измислиците добиваат фантастични размери“.
Станува збор за луксузна недвижнина во која вложила значителна сума, а чие изнајмување дневно чини и до 2.300 евра, зависно од сезоната и должината на престојот. Сепак, според пишувањата на дел од медиумите, вилата е празна, а проектот – неуспешен.
Неда одговори преку изјава за „Курир“: „Познато е дека отсекогаш сум била вредна и способна жена, и дека приходите од богатата кариера ги вложував во недвижности, уметнички предмети и во кариерата. Сакав еден ден на моите наследници да им оставам нешто по што ќе ме паметат, не само песните“.
За изнајмувањето на вилата објасни: „Агенција што издава над 500 куќи во Имотскиот регион, се занимава и со мојата. Не живеам од тоа, но ми е задоволство ако некој може таму да се одмори и да ужива.“
Додаде и дека изнајмувањето е можно само на најмалку седум дена, и дека куќата не се издава на дневна основа, ниту е тешко да се провери колку денови е резервирана.
„Измислиците добиваат фантастични димензии, што искрено ме забавува. Благодарение на тоа, покрај Црвеното и Синото езеро, станав уште една туристичка атракција на Имотскиот крај“, додаде Неда со доза хумор.
