Новиот албум на Милица Павловиќ предизвика различни реакции на социјалните мрежи, а во расправата се вклучи и Јелена Карлеуша, која упати низа саркастични коментари на сметка на својата колешка.
Откако Милица го најави својот шести студиски албум „Цака“, кој треба да биде објавен на 25 јуни, дел од корисниците на социјалните мрежи ја обвинија дека визуелниот концепт на проектот потсетува на веќе видени идеи.
Павловиќ претходно избриша повеќе од 6.000 објави од својот профил на Инстаграм и претстави нов визуелен идентитет во кој позира во црвен проѕирен трико на врвот на авион што го носи нејзиното име.
Додека бројни колеги, меѓу кои Николија, Реља Поповиќ, Џејла Рамовиќ и Рада Манојловиќ, ја поддржаа нејзината нова музичка приказна, критиките на интернет не изостанаа.
На тие коментари реагираше и Карлеуша, која на платформата Икс упати остри зборови кон Павловиќ.
„Таа нема фанови. Тоа се моите фанови кои се на годишен одмор, а кој токму сега завршува“, напиша Карлеуша.
Набргу потоа следуваше уште една провокација, овојпат насочена кон самиот наслов на албумот.
„Цака? Можеби е некој англиски збор каде што буквата Ц се чита како К?“, напиша пејачката со ироничен тон.
Caka? Možda je neka engleska reč gde se C čita kao K?
— Jelena Karleuša (@karlinbich) June 23, 2026
Конфликтот меѓу двете пејачки трае со години, а ова е само последниот во низата јавни судири што привлекоа големо внимание на регионалната јавност.
За разлика од Карлеуша, Милица Павловиќ засега не одговорила директно на прозивките. Наместо тоа, таа на своите следбеници им испрати суптилна порака поврзана со новиот проект.
„На овој лет примаме само храбри патници“, порача пејачката.
Инаку, на новиот албум Павловиќ соработува со познатиот грчки композитор Фивос, кој стои зад голем број балкански и грчки хитови.
