Српската пејачка Јелена Карлеуша јавно побара од медиумите повеќе да не го поврзуваат нејзиното име со животот на нејзиниот поранешен сопруг Душко Тошиќ, откако во јавноста се појавија информации за неговата нова љубовна врска.
Карлеуша на социјалните мрежи објави дека не сака нејзиното име и фотографија да се користат во текстови кои се однесуваат на Тошиќ и неговиот приватен живот.
„Ќе ги замолам сите медиуми, со кои имам навистина коректен однос, да не ги ставаат моето име и мојата фотографија во наслови кога пишуваат за мојот поранешен сопруг и неговиот живот“, напиша пејачката.
Во објавата таа изнесе и сериозни обвинувања на сметка на поранешниот фудбалер, тврдејќи дека во минатото повеќепати го пријавувала во полиција.
„Не сакам да имам никаква врска со човек кого повеќепати сум го пријавувала за семејно насилство, поради физички напад врз мене и мојот партнер, поради насилно влегување на приватен имот и други проблеми“, напиша Карлеуша.
Таа додаде дека не е заинтересирана за изборите и постапките на својот поранешен сопруг и побара да не биде доведувана во врска со неговиот приватен живот.
Нејзината реакција доаѓа откако српските медиуми објавија дека Душко Тошиќ е во врска со жена по име Нора. Според медиумските извештаи, двајцата се заедно околу пет месеци, а поранешниот фудбалер неодамна ја потврди врската.
„Точно е. Во среќна врска сум и задоволен сум“, изјави кусо Тошиќ за српските медиуми.
Иако нивната врска засега се одвива далеку од очите на јавноста, интересот за новата избраничка на Тошиќ не стивнува, а последното обраќање на Карлеуша дополнително го привлече вниманието на јавноста.
