По 11 години, Дино Мерлин повторно настапи на стадионот „Кошево“ во Сараево, отворајќи го првиот од трите распродадени концерти. Сепак, свечената атмосфера беше засенета од хаосот пред влезовите, каде што стотици посетители не успеале да влезат на стадионот.
Како што пренесува порталот „Фокус“, разочараните посетители, меѓу кои имало и луѓе што допатувале од други градови, неколку минути извикувале „Дино, крадецу“, по што се разотишле.
Засега не е познато дали проблемот настанал поради дуплирани билети што ги продавале препродавачи или станува збор за организациски пропуст. Се очекува во наредниот период да бидат познати повеќе детали.
И покрај инцидентот, Мерлин го започна концертот со емотивно обраќање до публиката.
„Не е баш лесно да се пее и да се одржи концерт толку блиску до дома. Јас сум роден на овој рид и сè уште сум со папочната врвца врзан за овој град, за неговите мириси, ѕвона, езаните и сè она што ме обликуваше. Ви благодарам што ми овозможивте да се чувствувам вака, толку блиску до дома“, рече пејачот.
Концертот беше проследен со огномет, впечатливи сценски ефекти и настап на гостинот Махир Битхаус за време на изведбата на песната „Средином“. Во текот на вечерта на видеобимовите беа прикажани и архивски фотографии од предвоено Сараево.
