Акустична гитара на која свирел фронтменот на „Нирвана“, Курт Кобејн, на незаборавниот концерт од серијата „Ем-ти-ви анплагд“, е продадена на аукција за рекордни 6,1 милион долари, објави аукциската куќа „Џулиен“ во саботата вечер.
Гитарата „мартин Д-18Е“ од 1959 година е продадена во рамки на дводневната аукција „Музички икони“, одржана во петокот и саботата.
Кобејн свирел на неа на снимањето во живо за Ем-ти-ви во ноември 1993 година, пет месеци пред неговата смрт во април, на возраст од 27 години.
Почетната цена на гитарата била еден милион долари, но од „Џулиен“ рекле дека интересот за неа бил огромен. Таа на крајот му припаднала на австралискиот бизнисмен Питер Фридмен за 6,1 милион долари, што претставува нов светски рекорд за продадена гитара. Гитарата е продадена заедно со оригиналниот куфер.
– Како дел од една од најнезаборавните свирки во историјата, оваа гитара има важно место во историјата на рокенролот – изјавил Дарен Џулиен, претседателот на аукциската куќа
