Хрватската пејачка Северина Вучковиќ денеска го слави 54-тиот роденден, а остварила завидна музичка кариера. Таа е најмладата ќерка на Ана и Север Вучковиќ, а има и постари сестри, Зденка и Маријана. Родена е и израсната во Сплит и секогаш била блиска со своите родители. Нејзиниот татко бил возач на камион во „Електродалмација“, а нејзината мајка работела како келнерка.
Токму затоа што биле многу поврзани, Северина тешко ја прифатила смртта на својот татко. Најтешко за неа било што неколку дена по неговиот погреб, имала закажано голем концерт во Домот на спортови во Загреб. Таа го добила името по нејзиниот татко, а мајката на Северина, Ана, во повеќе наврати нагласувала дека од него го наследила и изгледот и карактерот.
Пејачката е многу активна на социјалните мрежи, каде што во една прилика споделила со своите следбеници фотографија од својот татко од младоста, што предизвикало многумина да коментираат дека нејзиниот син Александар е копија на својот дедо.
„Мојот татко Север“, напишала Северина.
„Моето име некаде значи строгост и правда. Таква сум навистина. Тато сакаше да ми го даде името Наташа, но мама го обожаваше мојот татко, а неговото име беше Север. Дедо им давал имиња на своите деца според сите страни на светот. Верувале или не. Имал четири сина – Север, Југ, Исток, Запад, а неговата ќерка се викала Даница“, изјавила пејачката своевремено во српската емисија „Амиџи шоу“, па додала:
„Меѓутоа, баба ми не го сакала тоа. Така татко ми добил друго име. Сепак, од непозната причина, го задржал името Север, а јас така го добив името Северина. Имаше и сосед преку улицата чие име беше Северин… Така што… Но, сепак мислам дека е поради татко ми“.
Северина има син Александар (14) од претходната врска со Милан Поповиќ, а таа и Милан со години се борат за старателство. Пејачката беше свршена неколкупати, но судбоносното „да“ го изговори само со Игор Којиќ во 2015 година, од кого се разведе во 2021 година.
