Анџелина Џоли, која ретко дава интервјуа, прозборе за „Харперс базар“ од карантинот во Калифорнија, каде што моментно се наоѓа со шесте деца.
Џоли зборуваше за пандемијата и за зачувување на здравиот разум во текот на тешките моменти, но и за „неподносливиот расизам во САД и потребата да се направат промени во законите“.
„Систем кој ме штити мене – но не и ќерка ми или кој било друг маж, жена или дете во нашата земја само поради бојата на нивната кожа, едноставно не е допустлив“, остро рече Анџелина, која својата ќерка Захара ја посвои во Етиопија.
„Изгледа дека светот се буди, дека луѓето го принудуваат општеството на подлабоко преиспитување. Мора сочувството и добрите намери да ги однесеме чекор понапред, да ги преточиме во закони и правила кои се борат против безобзирноста и структуираниот расизам, рече оскаровката, која донираше 200.000 долари на НААЦП фонд за правна одбрана по смртта на Џорџ Флојд.
Што се однесува до самоизолацијата, Џоли не се жали дека и е здодевно.
„Како и многу други родители, фокусирана сум да останам мирна поради децата. Не сакам од мене да почувствуваат анксиозност, покрај сите грижи што ги чувствуваат. Целата моја енергија е насочена кон нив.“,
45-годишната актерка сподели две фотографии за списанието, кои ги снимил нејзиниот син Нокс.
