Српскиот пејач Аца Лукас бил уапсен од граничната полиција на аеродром во Гетеборг, објави српскиот медиум Курир, повикувајќи се на неофицијални извори.
Според истите информации, Лукас бил запрен при пасошка контрола, по што бил задржан на дополнително испрашување. По проверките, надлежните донеле одлука да не му дозволат влез во Шведска, од засега непознати причини.
Пејачот требало вечерва да настапи во Гетеборг заедно со Стефан Ѓуриќ Раста и Амар Гиле Јашарспахиќ, кои, според извештаите, без проблем ја поминале граничната контрола и влегле во земјата.
Неофицијално, се очекува Лукас да биде депортиран во наредните часови, додека во моментов се наоѓа под надзор и ја чека понатамошната процедура.
Ситуацијата создаде проблеми за организаторите на концертот, бидејќи Лукас бил една од главните ѕвезди на вечерта. Засега не е познато дали настанот ќе биде откажан или ќе се одржи без него.
До објавувањето на веста нема официјална потврда за случајот, ниту реакција од тимот на пејачот. Обидите да се стапи во контакт со него останале без одговор.
Аца Лукас уапсен на аеродром во Шведска, му бил забранет влез во земјата
