Ели Сааб е познат во светот по своите раскошни вечерни гала фустани и венчаници дизајнирани да ја истакнат женската фигура и да ја прикажат нејзината раскошна женственост. Нема девојка која не би се одлучила токму за некоја од неговите креации за нејзиниот посебен ден. Како дизајнер кој себеси, како и својот бренд ги изградил од нула, после страшното детство во војната која го зафатила Либан, Бејрут станал негов дом. Сите стравови што ги преживеал не го спречиле да ја гледа убавината во сите формати што ги направиле човекот и природата, кои се негова инспирација.
Дека некој е предодреден за нешто, зборува и тоа што на 9 години почнал со дизајнирање на фустани за своите сестри, за мајка му и за сосетките. Дека е некој апсолутно признаен од страна на своите колеги, зборува фактот дека тој е единствен арапски дизајнер кој изложува на модната недела во Милано (останатите изложувачи се исклучиво Италијани) и прв арапски дизајнер примен во француското здружение на високата мода.
Од 2002 година, кога Хали Бери се појави на доделувањето на Оскарите во негова креација, интересирањето за неговите фустани не престанува. Најинтересно е тоа што тој е самоук, чист талент, и не престанува да восхитува.
Неговите фустани се изработени од најнежни материјали и украсени се исклучиво со рачна изработка. Кога на едно парче облека ќе замислите толку многу монистра, крлушки и шлокици, би помислиле дека тоа мора да е кич. Но, кај Елие Сааб тоа едноставно не е така – сè е со вистинска мерка.
Со истата идеја и мерка настанале и неговите парфемски линии „Le Parfum“ и „Girl of Now“. Шишенцата се дизајнирани како скапоцености со детали кои ги следат неговите колекции.
