Жените се навикнати да се справуваат со тешкотиите со кои се соочуваат во текот на работата, на работното место или во секојдневниот живот, што, помалку или повеќе ги прави нееднакви со мажите. Изненадувачки е фактот што жените изумиле работи кои сè уште ги користиме во секојдневниот живот. Овие изуми се креирани од храбри жени, кои несомнено ги промениле стандардите на тоа време во коешто живееле и ни оставиле едно добро, убаво наследство.
Алатки, како што се шприцеви за инјекции, бришачи за автомобилски стакла и кевлар (отпорен материјал што се употребува во непробојни одела), покрај други изуми, се креирани од жени, многу одамна и се многу напредни изуми за времето во кое тие живееле.
Бришачи за автомобилски стакла
Оваа незаменлива алатка што обезбедува добра видливост за возачите во врнежливи денови е креирана и патентирана од Мери Андерсон во 1903 година. Таа дошла до оваа идеја за време на возење среде снежни врнежи, кога увидела дека чистото автомобилско стакло е од исклучителна важност за возење во такви временски услови.
Филтер за кафе
На Мелита Бенц, домаќинка, навистина ѝ било тешко чистењето на платнените филтри за кафе што се употребувале во тоа време. Така, решила да најде начин кафето да се филтрира, но филтерот да биде полесен за чистење. По неколку направени обиди, таа земала една метална шолја за кафе, направила неколку дупки на дното, ставила преку шолјата хартија од нотесот на нејзиниот син, го филтрирала кафето и – резултатот бил одличен! Мелита го регистрирала овој свој патент во 1908 година, а набрзо потоа започнала свој бизнис. Подоцна, за време на Втората светска војна, нејзината компанија се соочила со многу тешкотии, но успеала да се одржи и да забележи раст. Покрај бизнисот, Мелита водела грижа и за своите вработени и за нивната благосостојба. Одлучила да го продолжи нивниот одмор, да го скрати работното време, да им дава бонуси за Божиќ, како и да основа социјален фонд за сите нив. Денес нејзината компанија е силна и е управувана од семејството.
Шприц за инјекции
Летиција Мамфорд Геер, медицинска сестра од Америка е одговорна за првиот шприц со игла произведен во 1899 година. Без сомнение, ова било многу важен изум во здравството и се проширил, од првобитната употреба во операционите сали, на сите останати сектори во здравството, како почетен модел на шприцот со игла што го знаеме денеска.
Пелени за една употреба
Марион Донован ја креирала првата непропустлива пелена за една употреба. Оваа идеја се родила по Втората светска војна, во време кога таа била целосно посветена на семејниот живот и секојдневните семејни обврски. Со машина за шиење и пластична завеса за туш успеала да го создаде својот прв прототип. Донован исто така ги креирала и првите лепенки за пелените, како замена за безопасните игли. Овие, како и многу други изуми ја сместија Марион во групата на познати изумители.
Машина за миење садови
Џозефин Кокран ја создала првата машина за миење садови во 1886 година. Неколку години подоцна таа успеала да го привлече вниманието и интересот на сопственици на ресторани за време на саем во Чикаго, но машината добила вистинска важност во педесеттите години на минатиот век, период кога машина за миење садови можеле да си купат повеќе домаќинства.
Со својот изум Џозефин заслужено се сместува во групата на славните изумители.
Играта Монопол
Елизабет Џ. Филипс е креаторка на популарната игра Монопол. На почетокот идејата била да се прикаже колку може капитализмот да биде суров. Играта, која била патентирана во 1904 година, се распродала како да е дизајнирана од Чарлс Дароу. За среќа, копманијата, откако се сретнала со вистинската дизајнерка на оваа популарна игра, нашла начин како да ѝ надомести.
Чамец за спасување
По успехот на својот изум за побрзо производство на буриња, Марија Бесли одлучила да создаде покомпактен, побезбеден, огноотпорен чамец за спасување за едноставна употреба. Тоа било во 1880 година, кога Марија го направила својот нов дизајн. Она што таа не можела ни да го замисли е дека чамците за спасување години подоцна ќе спасат многу луѓе за време на потонувањето на „Титаник“.
Невидливо стакло
Катарина Бур Блоџет е првата жена со докторат по физика на Универзитетот Кембриџ во 1926 година. По докторирањето таа креирала стакло со ниска рефлексија (невидливо стакло), што помогнало да се подобрат камерите, микроскопите и технологијата на проекторите во тоа време. Оваа нејзина технологија се употребила дури и во славниот филм „Одвеано со виорот“.
Кевлар (непробојна ткаенина)
Стефани Кволек, која докторирала хемија, е креаторот на екстремно јаката ткаенина, позната под името кевлар. Оваа ткаенина е околу петпати посилна од челикот и се користи за изработка на елеци отпорни на куршуми, како и за повеќе други продукти.
Безжична мрежа
Глумицата изумител Хеди Ламар, со нејзиниот партнер, пријателот и композитор Џорџ Антеил, ја креирале технологијата позната како претходник на ви-фи технологијата. Нејзината идеја се употребила за далечинските управувачи на торпедата, како и во превенција од откривање на непријателот, со промена на фреквенцијата на радиосигналите во спектралниот појас. Во тоа време морепловната воена флота на Соединетите Американски Држави не се сложила да го имплементира овој нејзин изум, но по повеќе години сепак почнал да се употребува. Во доцните деведесетти овие двајца пронаоѓачи примиле огромна награда за својот изум и во 2014 година Ламар влезе во групата на славните пронаоѓачи.
Овие и многу други жени направија револуција во светот и станаа примери за сила, за храброст и за посветенот. Дали знаевте дека сиве овие работи се измислени од жени?
