Божиќните пости кои траат 40 дена се голем предизвик како за верниците, така и за традиционалната македонска кујна. Традиционалното посно мени овојпат сакаме да го збогатиме со нови посни рецепти кои ќе бидат лесни за подготовка и вкусни за да уживате комплетно во постот.
За оваа вечер нашиот предлог е една превкусна компир салата со свежа марула, а тајната зошто е толку вкусна се крие во преливот од таан и сенф. Здраво, вкусно, лесно и посно. Мора да пробате!
– 400гр. компир
– 100гр. црвен кромид
– 1 голема марула
– 20гр. таан
– 20гр. сенф
– сок од лимон
– сол и бибер по вкус
Сварете ги компирите во лушпа, а откако убаво ќе се изладат излупете ги и исечете ги на тенки тркалца. Измијте ја убаво марулата и исушете ја со кујнска крпа. Исечете ја марулата најситно што можете и измешајте ја со варениот компир. Додадете го кромидот исечкан на тркалца.
Во мал сад измешајте ги таанот и сенфот, а потоа додедете малку сок од лимон, сол и бибер по желба. Мешајте убаво со маталка за сите состојки да се соединат.
Прелијте ја салата, убаво измешајте и сервирајте во длабок сад.
Добар апетит!
