Пејачката Ивана Селаков со месеци наназад го подготвува својот прв солистички концерт, а најголема поддршка и ветер во грб ѝ е сопругот Пеѓа Мирковиќ. Претходниот период за неа бил навистина стресен – имало и недоразбирања со сопругот, бидејќи се труди да биде на висина на задачата на сите полиња.
– Се потрудивме да понудиме добар музички квалитет, задоволство, уживање за секого. Акцентот е на извонредната свирка, добрите гости и квалитетната музичка програма. Очекувам вечер и за џускање, и за солзи, и за емоции – изјави таа, а на прашањето дали имало солзи за време на подготовките, Ивана рече:
– Имаше стрес и сè уште го има. Кога влеговме во ова, влеговме како семејство, нема никаква продукција зад нас. Јас и мојот сопруг заменивме триесет луѓе, и тоа е многу стресно, затоа што покрај сето тоа сме и родители, живееме најнормален живот – од сабајле го спремаме детето за училиште, појадок, ручек, а паралелно со тоа снимив многу емисии, проби – тоа е многу тешко за две лица. На крајот, кога ќе помине концертот и ќе го погледнеме снимениот материјал, ќе си кажеме „Браво“. Да, стресно е, но ќе биде послатко.
Пејачката не крие дека со сопругот имала недоразбирања за време на подготовките на првиот солистички концерт.
– Па нормално е да има недоразбирања. Колку е поголема одговорноста, толку се поголеми и обврските, а се случуваат и ситни проблеми врз кои не можеме да влијаеме, што само го зголемува стресот. Треба да истуркаме уште малку, но не е лесно – рече Ивана, додавајќи дека таа прва попушта:
– Таков ми е хороскопскиот знак, помирна сум, полесно поднесувам некои работи. Добро е што сме спротивни и имаме различни мислења.
Ивана ѝ подготви на својата публика, како што вели, вечер полна со емоции, но и со изненадувања.
– Ако ги ставевме сите песни што сакавме, концертот ќе траеше пет часа, што е невозможно, па се обидовме да го ограничиме репертоарот на разумно време. Имаме одлични гости, врвни пејачи – Мирза Селимовиќ веќе го спомнав, имаме дует што сите го сакаат. Ќе има и гости изненадување, се радувам на нивното присуство, затоа што и јас ќе уживам да ги слушам. Ќе има и блок песни што јас приватно ги сакам.
