При истражувањето на подводниот вулкан лоциран на длабочина од повеќе од 2 километри во Тихиот Океан во 2017 година, научниците биле воодушевени од глетката што ја затекнале.
Наместо дрвја, оваа подводна шума била составена од корали со необичен облик. Меѓу највпечатливите биле – Rhodaniridogorgia, кој изгледа како четка за шишиња, како и сплесканите и коралите во облик на харфа, на чии гранки имало намотани долги и розови сродници на морски ѕвезди. Околу нив имало стаклести сунѓери.
Кога забележале сунѓер со високо стебло на чиј врв се наоѓал завршеток во облик на диња со две дупки кои ги потсетувале на замаглени очи, го нарекле „ИТ Сунѓер“ – според истоимениот филмски лик на Стивен Спилберг. Три години подоцна, најинтригантното откритие од „шумата на чудните“ го доби научното име Advhena magnifica или величенствен вонземјанин.
Сунѓерите можеби изгледаат како растенија, но тие се всушност животни. Тие немаат лице, мозок, срце, мускули или кој било друг орган. Повеќето од нив го поминуваат својот живот прикачени на морското дно, собирајќи мали лебдечки честички од храна со нивните сунѓерести тела. Advhena magnifica претходно беше забележана само уште еднаш една година претходно во близина на Маријанскиот ров, кога беше земен примерок и однесен на испитување кај д-р Кристијана Бранко. Штом го видела, докторката знаела дека гледа во нешто сосема поинакво.
Неговото тело е изградено од ситни структури наречени спикули, кои се направени од силициум диоксид. Испитувајќи ги овие сложени структури под микроскоп, Бранко забележала дека тие се разликуваат од оние што ги видела во другите сунѓери. Затоа, таа заклучила дека не се работи само за нов вид, туку и за сосема нов род на длабокоморски сунѓери што никој претходно не ги опишал.
Меѓутоа, кога го погледнала видеото од „шумата на чудните“, забележала дека сите сунѓери се ориентирани во иста насока за собирање на хранливи материи. Ова ја навело да помисли дека под микроскоп новооткриениот вонземски сунѓер изгледа поинаку – има поинаква структура во споредба со другите сунѓери – затоа што се приспособил на суровите услови за полесно да стигне до храна на места каде што е реткост.
