На предлог на претседателот на Општинскиот суд во Сплит, Државниот судски совет на својата претпоследна седница, донесе одлука за тримесечна суспензија на судијка од Кривичниот оддел на Сплитскиот суд, поради кривичната постапка што против неа ја води Општинското државно обвинителство во Шибеник, објавува порталот „Далматински“.
Судот во Шибеник неодамна го потврди обвинението за кривичните дела закана за повреда на поранешен сопруг и повреда на правата на дете. Првото кривично дело може да се казни со затвор до три години, а второто со затвор до пет години.
Се очекува привремената суспензија да трае до завршувањето на кривичната постапка, па се претпоставува дека случаите на обвинетата судијка ќе им бидат доделени на нејзините колеги. Конечниот исход на сè, секако, ќе зависи од одлуката на судот што ќе го води овој кривичен случај против судијата од Сплит.
Еден од оние чие судење ќе мора да започне одново е словенечкиот бизнисмен Рок Гале, кој беше суден од суспендираната судијка за кражба на вредни предмети во сопственост на водителката Николина Пишек и нејзиниот покоен сопруг Видоје. Денешното рочиште беше откажано откако Врховниот суд донесе одлука за привремено суспендирање од должност.
Рок Гале, сопственик на вила на падините на Козјак што ја издава под наем на туристи, е обвинет за кражба на вредни предмети од семејството Ристовиќ.
Според обвинението, на крајот на јули 2020 година, Рок (54) „го искористил отсуството на гостите и одзел вредни предмети“ во вредност од околу 300 илјади евра од вилата што им ја изнајмил: во обвинението се наведуваат најмалку 63 илјади евра во готово, машки часовник „Cvstos“, вреден 18 илјади евра, златен машки часовник „Pierre Kunz“, вреден 25 илјади евра, часовник „Rolex Sky Dweler Rose Gold“, вреден 35 илјади евра, нараквица „Cartier Love“ со дијаманти, вредна повеќе од 40 илјади евра, женски прстен „Cartier Panthere“, вреден 24 илјади евра и женски прстен „Chopard“, вреден дури 65 илјади евра.
