Некогашниот дом на еден од најпознатите изведувачи на народна музика, Предраг Живковиќ – Тозовац, денес е во многу лоша состојба, пренесува „Република“.
Куќата во Краљево, каде што Тозовац ја поминал својата младост, сега е само сенка од нејзината поранешна слава. Според локалните жители, овој простор е целосно срушен, обраснат со плевел, а траги од заборав се гледаат на секој чекор. Прозорците се скршени, додека стаклото е расфрлано по подот, а вратите висат на шарките. Внатрешноста на овој дом повеќе наликува на руина отколку на место каде што некогаш живеел музичкиот великан.
Денес, дворот е речиси непрооден, покриен со густа вегетација и грмушки. Овој локален човек носталгично се сеќава на својата младост, кога децата си играле во дворот, додека сега единствените посетители на напуштената куќа се кучињата скитници и мачките.
Мештаните се обединети во својот апел за реставрација на овој простор, бидејќи веруваат дека Тозовац заслужува подобро од ова.
„Не бараме да се изгради споменик, туку да се поправи, за да не пропадне сè. Тозовац не беше кој било. Тој беше легенда“, нагласуваат тие.
Иако немаат официјални информации за сопственоста на куќата, јасно е дека постои желба да се зачува споменот на уметникот чии текстови ја обликуваа музичката сцена. За жал, куќата денес не личи на местото што му припаѓаше на уметникот чие дело остави длабок белег во културата.
Предраг Живковиќ почина на 6 април 2021 година на 85-годишна возраст. Во последните недели од својот живот се бореше против короната. Тозовац беше композитор, текстописец, хармоникаш и пејач кого го обожаваа сите генерации. Зад себе остави бројни антологиски песни, како што се „Јесен у мом сокаку“, „Мирјана“, „Овамо, Цигани“, „Женски очи“, „Празна чаша“, „Еремија“ и други. Роден е на 22 јануари 1936 година во Краљево, а живеел и починал во Белград.
