Српскиот актер Сергеј Трифуновиќ вчера, 23 октомври, ја пријавил сопругата Исидора Мијановиќ за семејно насилство, откако парот се скарал во нивниот семеен стан во Вождовац. Исидора која е од Риека, Хрватска, го привлече вниманието на јавноста кога се омажи за 23 години постариот актер, а до неодамна работеше на телевизија Хајп како водителка, а како што тврди извор близок до овој медиум, таа наводно добила отказ.
– Кога почна да работи на телевизија, сè функционираше како што треба. Меѓутоа, во еден момент почна несериозно да ја сфаќа работата и често доцнеше. Тоа беше причината поради која доби отказ – рекол извор за српски „Ало“.
Да потсетиме, откако Сергеј се вратил од промоцијата на Сајси МЦ, а претходно не ѝ рекол каде оди ниту ѝ се јавувал на телефон, следувала кавга во која Трифуновиќ наводно ѝ рекол дека сака развод и тогаш работите ескалирале. Ниту еден од сопружниците не е повреден.
Трифуновиќ и неговата сопруга биле сослушани во полициска станица, а обвинителот изјавил дека нема елементи на кривично дело. Но, било утврдено дека Исидора илегално престојувала во Србија, со оглед на тоа што е државјанка на Хрватска, а против неа е поднесена прекршочна пријава врз основа на Законот за странци. По правосилноста на пресудата на судијата за прекршоци, таа ќе треба да плати парична казна и ѝ е наложено да ја напушти Србија во рок од 24 часа.
Според српските медиуми, таа моментално се наоѓа во имигрантски центар и наскоро ќе биде однесена на хрватската граница, каде некој ќе мора да дојде да ја земе.
