Здравствената состојба на познатиот музичар Бора Ѓорѓевиќ (71) е влошена, а сите негови настапи се откажани до понатамошно известување.
Имено, на официјалната фејсбук-страница на групата „Рибља чорба“ објавено е соопштение за здравствена состојба на Бора Ѓорѓевиќ.
– Драги пријатели, поради нарушената здравствена состојба на Бора Ѓорѓевиќ, лекарите му забранија да патува и да се напрега поради тешко воспаление на белите дробови, како и влошување на состојбата со хронична опструктивна болест на белите дробови. Секако, како и секогаш, ќе ги победиме болестите и штом Бора се опорави ќе се видиме на нови дружења! – се наведува на официјалната Фејсбук страница на групата.
Да потсетиме, фронтменот на групата „Рибља Чорба“ Бора Ѓорѓевиќ (71) поради болест го откажа својот настап и за Нова година.
Инаку, Бора живее во Словенија со сопругата, која му е голема поддршка.
– Веројатно ќе умрев некаде попат да не дојдев во Словенија бидејќи бев премногу див. И тоа има свои добри страни, но јас малку претерав. Ова го сфатив кога некои мои делови престанаа да работат, а немаше резервни. Не реагирав веднаш, се опуштив. Човек најпрво помислува: „Ќе терам додека можам“, воопшто не се загрижува. Сега знам покрај кого сум и кој ме сака, и дека има смисла да се трудам да траам што подолго, за и таа љубов да потрае – објаснил неодамна Бора.
