Градоначалникот на Киев Виталиј Кличко рече дека жителите треба да бидат подготвени за секоја ситуација, вклучително и делумна евакуација во предградијата.
„Не го исклучувам најлошото сценарио. Целосна евакуација нема да има – можеби делумна, но не може да се нарече евакуација. Ова е привремено преместување на одредени категории луѓе во предградијата, каде што може да има струја“, рече градоначалникот на Киев во интервју за РБЦ Украина.
Градоначалникот појасни дека не се зборува за преселување на жителите на Киев во други региони на Украина или нивна селидба во странство.
Дополнително, Кличко упати апел до жителите на градот со барање да складираат вода за пиење, храна што може да се консумира или готви без струја, како и топла облека, наполнети технички апарати и банкноти.
„Во случај на лошо сценарио, би било добро секој да има можност или да оди во својата куќа во предградијата, каде што има вода, струја, или да оди кај своите пријатели во предградијата“, додаде градоначалникот.
Понатаму, Кличко изјави дека прекинот на електричната енергија во градот може да трае до пролет, пренесува „РБЦ Украина“.
Според Кличко, властите во Киев се обидуваат „да обноват сè што е можно побрзо“.
„Се обидуваме да преминеме на јасни распореди за да нема изненадувања и потоа да преминеме на непречено снабдување со електрична енергија. Но, мора да бидеме подготвени за фактот дека исклучувањата на електрична енергија може да бидат до пролет“, рече тој.
Кличко објасни дека прекинот на енергија се случува поради големото оптоварување на енергетскиот систем во студената сезона.
