„Сè уште сме тука, во борбата и во верата. Уште една ноќ заедно“. Со овие зборови Кели Насименто, ќерката на легендарниот бразилски шампион Пеле (82), објави фотографија со својот татко. Слатка и драматична фотографија во исто време, прегратка од болничкиот кревет, во просторијата во која од минатиот 29 ноември е хоспитализиран О Реи (крал на португалски јазик), единствениот фудбалер во историјата кој освоил три Светски првенства.
Последниот медицински извештај издаден од болницата Алберт Ајнштајн во Сао Паоло, каде што е хоспитализиран шампионот, ги потврдува сериозните здравствени состојби на Пеле, кому пред околу една година му беше дијагностициран рак на дебелото црево.
„Ракот на дебелото црево напредува. На пациентот му е потребна поголема помош за лекување на бубрежна и срцева инсуфициенција“, стои во зборовите објавени од болницата.
Пред само неколку дена, ѕвездата на светскиот фудбал преку социјалните мрежи им честиташе на Меси и Аргентина за победата на Светското првенство, кои ја победија Франција во тензичното финале кое заврши со пенали.
Семејството останува со шампионот, двете ќерки Кели Насименто и Флавија Арантес кои во последните денови преку социјалните мрежи комуницираа со фановите, известувајќи ги дека нивниот татко божиќните празници ќе ги помине во болница.
Оние кои не можат физички да бидат блиску до него – особено сега за Божиќ, се духовно блиски, како и целиот фудбалски свет кој со денови изразува пораки на наклонетост и поддршка за бразилскиот шампион. Легенда која никој нема да ја заборави.
