Нутриционистката Билјана Ристеска споделува со нас два рецепти за подготовка на здрава храна.
Што всушност претставува здрава храна? Колку често и зошто ја консумираме? Самоиницијативно го менуваме начинот на исхрана или само затоа што некој друг го направил тоа претходно? Многу прашања на една тема. Одговорите им се познати на нутриционистите, но дали и кој ги слуша?
Билјана Ристеска долги години самостојно работи и активно е посветена на нутриционизмот. Има многубројни достигнувања од областа на едукацијата, превенцијата, бенефитот од консумирањето на здрава храна.
Со нас споделува два рецепти кои се вкусни, здрави и едноставни.
– Не мора да се водите по грамажа на намирниците, слободно експериментирајте, додавајте или одземајте од количините – вели Билјана.
Рецепт за полнети печурки:
Претходно исчистените печурки се премачкуваат со сенф или со доматно пире. Настрана, ситно исечкајте зеленчук по желба ( лук, кромид, пиперка, туквица, може и модар патлиџан, морков, блитва, магдонос…) дозволено е се што имате дома. Не ги заборавајте зачините. Измешајте и со смесата наполнете ги печурките. На крај можете да додадете, по желба, сусам, афион или лен, но и малку кашкавал.
Хранливата вредност на печурките е огромна, богати со протеин, ги има дури 45% во сувите печурки. Ги содржат сите есенцијални аминокиселини, богати се со витамини, пред се од групите А,Б,Ц,К, бетакаротен и ергостерол. Содржат растителни масти, протеини, минерали.
Шампињоните се едни од ретките извори на витамин Д од растително потекло. Секој вид печурки има различен вид лековито својство.
Рецепт за кофтиња од црвена леќа
– Смесата за ќофтињата се подготвува од црвена леќа, варена или откисната 10тина часа. Рендана и исцедена тиквичка, рендано морковче, кромидче, лукче, зачини по желба и вкус: бибер, куркума, оригано, магдонос, на крај сусам. Се печат во рерна околу 20-на минути ( може и помалку во зависност од вашата рерна), вели нутриционистката Билјана.
Леќата е нутритивно здрава храна и голем извор на белковини. Од витамини содржи Б1 и Б9, минерали, железо, магнезиум, фосфор, цинк и калиум.
Има влијание врз намалување на холестеролот во крвта, благодарение на содржината на диетални влакна кои ги содржи. Добра е против запек, одлично го одржува нивото на шеќер во крвта што е многу важно за дијабетичарите.
Леќата игра значајна улога во намалување на ризикот од појава на кардиоваскуларни заболувања.
Здрава храна не значи следење на светските модни трендови. Здрава храна подразбира дневен внес на хранливи материи во согласност со потребите на еден организам, што значи треба да се направи добар баланс меѓу внесените компоненти – витамини, минерали, аминокиселини, незаситени масти, јагленохидрати.
