Фолк-пејачка Зуица Лазова беше гостинка во емисијата „Мамавизија“ и отворено раскажа за некои од најтешките, но и најсреќните моменти од животот.
-Мајка ми почина во 2000 година. Бев во неизмерна тага кога набргу по трагедијата дознав дека сум бремена. И покрај несредената врска со Наум, тој сè уште не беше официјално разведен, во ниеден момент не се посомневав дека нема да ја родам. Кога сега ќе се присетам, целата таа бременост помина во такво премреже, вознемиреност – се присетува Лазова.
Ќерката Македонка ја родила вонбрачно, а како еден од најтешките моменти го издвојува денот кога му соопштила на татко ѝ дека ќе стане мајка.
– Најтешко ми беше како ќе му кажам на тато. Па тој само што ја изгуби жената на својот живот. Долго време собирав храброст да му соопштам дека ќе родам дете вонбрачно. Тоа беше многу чудно за мене, растена во конвенционално семејство со строги правила. Другарките ме бодреа и во четвртиот месец од бременоста едноставно и директно му кажав дека ќе родам дете од човекот што го сакам и така ќе биде, оти не сакам да бидам со некого во брак само „ради реда“ – се присетува таа.
Македонка името го добила по нејзината покојна баба Донка, мајката на Зуица.
Со ќерката живеела сама четири и пол години додека официјално се приклучил и таткото Наум, кого ќе го опише како посветен и попустлив родител.
– Јас сум полицаецот дома, таа што вика, построгиот родител, ама пак Наум повеќе го слушаат. Не знам како успева – вели Лазова.
За синот Стефан низ смеа вели дека е „на Господ бељата“.
– Толку пекавме син, син, посебно Наум, ама тој син скапо нè чинеше. Колку што Македонка беше мирна, дупло повеќе беше немирен Стефан. Како дете беше страшно темпераментен, а тоа многу добро го знаат сите наши блиски – откри Зуица.
