Водителот Жика Јакшиќ откри дека пред 8 години купил гробно место на гробиштата Новите Бежанија и дека ќе почива покрај Саша Поповиќ, пишува српски „Курир“.
Естрадниот маг Саша Поповиќ почина на 1 март 2025 година во Париз, а беше погребан на Бежанијските гробишта во Белград.
Неговиот долгогодишен пријател и колега Жика Јакшиќ сега откри непознати детали и призна дека Бане Обрадовиќ му го отстапил своето погребно место на Саша Поповиќ.
– Јас го купив своето вечно почивалиште пред седум или осум години. Првично, Бане Обрадовиќ требаше да биде таму, но бидејќи Саша ненадејно замина, тогаш тој му го отстапи нему и така јас и Саша, кога ќе умрам, ќе бидем покрај него и тоа ќе бидат највеселите гробишта на светот. Ние на мир ќе ги правиме и „Ѕвездите на Гранд“ и „Никогаш не е доцна“ – рекол Жика со насмевка во емисијата „Глам и драма“.
Инаку, водителот Жика Јакшиќ неодамна доживеа мозочен удар, па проговори за последиците и откри како напредува неговото закрепнување.
Жика Јакшиќ се потсети на денот кога доживеа мозочен удар и откри какви симптоми имал.
– Едно утро станав, се истуширав и не забележав ништо додека не почнав да се бричам. Се чувствував како десната рака да не ми е моја, видов во огледалото дека десната страна од лицето ми падна и не можев да зборувам. Сфатив дека тоа е мозочен удар, излегов од дома и еден вработен ме однесе во КБЦ Бежанијска коса, таму веднаш утврдија дека е мозочен удар и ме префрлија во болницата Свети Сава. Бев опкружен со илјада лекари, имаше многу некои снимања. Дури по 24 часа се освестив и зборував како најпијан човек – рекол Жика, кој поминал една недела во болница, по што започнал со рехабилитација.
– Сè уште зборувам отежнато и чувствувам дека десната страна ми е хендикепирана. Често во разговорот ми недостасува некој збор, едноставно застанувам, во главата ми се случува конфузија – рекол водителот кој двапати неделно оди на логопед.
– Високиот притисок е штетен бидејќи поминува низ вените и артериите, ѕидовите на крвните садови се оптоваруваат – објасни тој за локалните медиуми.
