Шефот на украинската држава ги наведува првите срамежливи знаци на закрепнување: ослободени населби; деминирање во тек; обновување на водата, струјата и гасот, како и обновување на железничките врски.
Украинскиот претседател Володимир Зеленски во својот вообичаен, најнов видео-говор уште еднаш побара повеќе оружје за Киев и повеќе санкции против Москва, како што тоа го прави со денови. „Ако некој рече „Година или години“, јас велам „Војната може да трае многу пократко“. Колку повеќе и побрзо го имаме сето оружје што го побаравме, толку ќе биде посилна нашата позиција и побрзо ќе дојде мирот – изјави шефот на украинската држава.
„Колку повеќе и побрзо ја имаме финансиската поддршка што ја побаравме, толку побрзо ќе има мир. Колку побрзо демократскиот свет препознае дека ембаргото за нафта против Русија и целосната блокада на нејзиниот банкарски сектор се неопходни чекори кон мирот, толку побрзо ќе заврши војната. Главната цел е да се забрза враќањето на мирот“, додаде Зеленски.
Потоа, претседателот се фокусираше на утешните податоци за делумно враќање на „нормалниот живот“ во некои делови на Украина, оние што ги напушти руската армија по повлекувањето:
„Враќањето на нормалниот живот во областите продолжува и во областите каде што се протерани окупаторите – објасни шефот на државата, додавајќи дека „обемот на работа е навистина огромен: 918 населби од различни размери, но подеднакво важни за нас, за Украина, веќе се ослободени. Вршиме деминирање. Го обновуваме снабдувањето со струја, вода и гас. Ја враќаме работата на полицијата, поштата, државните и локалните власти. Хуманитарните канцеларии почнаа да работат на територијата на 338 ослободени населби“, рече Зеленски.
