„Руското раководство сака да ве вовлече во војна со Украина бидејќи не се грижат за вашите животи. Но, вие не сте робови и не сте топовско месо: можете сами да одлучувате за својата судбина“. Вака украинскиот претседател Володимир Зеленски им се обрати на граѓаните на Белорусија во својата традиционална вечерна видео порака, во која сакаше да им се обрати „на луѓето, на цивили и на оние кои се во униформи“.
Белорусите веќе се „вклучени во војната“ – нагласи тој – „уште поактивно отколку што беа во февруари и во пролетните месеци“.
Зборовите на Зеленски доаѓаат ден по најавата на Путин дека има намера да достави до Минск проектили способни да носат нуклеарни боеви глави, во наредните месеци.
Во меѓувреме и САД ја осудуваат Белорусија што се вплткува во војната на Путин, после случајот со лансирање проектили кон Украина од белоруска територија.
„Режимот на Лукашенко продолжува да ѝ дозволува на Русија да ја користи територијата и воздушниот простор на Белорусија, да ја напаѓа Украина и да убива цивили“, се вели во соопштението на Стејт департментот на САД каде се нагласува „американската осуда на Минск, затоа што ѝ дозволи на Русија да изврши злосторства во Украина“. САД, заклучува во соопштението, дека „ќе продолжат да бараат од режимот одговорност за своите постапки“.
