Познатата музичка двојка Ленче и Горан Кукиќ, открија интересни детали од нивното секојдневие преку забавен квиз на искреноста. Иако на сцената се совршен тандем, приватно признаваат дека имаат различни темпераменти, но и рецепт за долговечен брак.
Кога станува збор за емоциите и лутењето, Ленче беше првата што посочи кон себе, но и кон Горан.
„Тој повеќе се лути, ама побрзо му поминува“, низ насмевка искоментира Ленче во опуштена атмосфера во емисијата „Магазин“ на ТВ Сител.
Горан веднаш се надоврза со потврда: „Да, јас брзо се лутам, ама навистина брзо ми поминува.“
На прашањето кој е поголем трошаџија во домот, двајцата едногласно покажаа кон Ленче. Сепак, кога дојде ред на тоа кој го има последниот збор во куќата, Горан реши машки да „пресече“: „Јас го имам последниот збор! Што и да се случи, мојот последен збор е: ’Добро жено, нека биде така’, се пошегува Горан.
Еден од најинтересните моменти беше откривањето на нивните утрински навики. Додека Горан сака мир, Ленче веќе го има испланирано целиот ден.
„Горан секогаш вели: ’Јас сам ќе си пијам кафе доле’, затоа што јас уште од сабајле прашувам: ’А што е планот за денеска?’“, раскажува Ленче.
Горан со насмевка објасни како изгледа тоа од негова перспектива: „Кај неа мозокот работи со полна пареа уште пред да се разбуди. Седнуваш на кафе и таа веќе почнува: ’Слушај, јас мислам денес ова да го решиме, она да го направиме…’“.
Иако се долго време на естрадата, двајцата се согласија дека се исклучително точни и професионални. На прашањето кој почесто доцни на настап, одговорот беше краток и јасен: „Никој!“
Сепак, кога станува збор за помнењето на текстовите на песните, Ленче е победник.
„Ленче подобро памти текстови, дефинитивно“, призна рече Горан и додаде дека тие се тим кој одлично се надополнува и по толку години заеднички живот и кариера.
View this post on Instagram
