Американскиот рапер и хип-хоп магнат Шон „Диди“ Комбс ќе остане во притвор додека не му се суди за трговија со луѓе.
Судијата Робин Тарнофски ја донесе одлуката пред судот на Менхетен по долга дебата меѓу правните тимови за тоа дали Комбс е во ризик за бегство.
Обвинителите тврдеа дека неговото огромно богатство (скоро 1 милијарда долари и сопственост на приватен авион) и сериозната природа на обвиненијата значат дека тој е „екстремна опасност за заедницата“ и дека може да се обиде да ја избегне правдата.
Адвокатот на Комбс, Марк Агнифило, пред судот изјави дека музичкиот магнат бил на терапија и дека е подобен за домашен притвор, кој одбраната го побара со гаранција од 50 милиони долари.
Комбс претходно се изјасни за невин по три точки од обвинението за заговор, трговија со луѓе и транспорт на лица за проституција.
На прашањето како се изјаснува за обвиненијата, тој рече дека „не е виновен“, пренесува Би-Би-Си.
Обвинителите тврдат дека Комбс ја користел својата огромна деловна империја за да се заканува, насилно да напаѓа и да ги принудува жените да ги „исполнат неговите сексуални желби“.
Федералните обвинители го нарекоа Комбс опасен и побараа тој да биде задржан без кауција, пренесува АП.
„Тој ги користел огромните ресурси на неговата компанија за да го олесни своето злоставување и да ги прикрие своите злосторства. Едноставно кажано, тој е сериски насилник“, рече помошникот на американската обвинителка Емили Џонсон пред судот.
Таа, исто така, рече дека Комбс има „обемна историја на попречување на правдата“, вклучувајќи наводно поткупување и заплашување сведоци.
Апсењето на Менхетен уследи по рациите на два негови имоти во Лос Анџелес и Мајами во март, како дел од „тековната истрага“ за трговија со луѓе.
