Никол Кидман и Кит Урбан се разделија по речиси две децении заедно, потврди извор за „Би-би-си“.
Добитничката на Оскар, актерката и четирикратниот добитник на Греми и кантри музичарот Кит Урбан, се венчаа во јуни 2006 година.
Веста прв ја објави „Ти-ем-зи“, повикувајќи се на извори дека двојката живее разделено од летото, а Кидман наводно не сака раскинување. Извор на „Би-би-си“ ги потврди овие тврдења. Причините за прекинот засега не се познати.
Кидман и Урбан, двајцата израснати во Австралија, поминале низ многу подеми и падови во текот на нивните речиси 20 години заедно. Овој холивудски пар има две ќерки: Сандеј Роуз (17) и Фејт Маргарет (14).
Во нивните моменти на слава, двајцата освоија и беа номинирани за најважните награди во филмската и музичката индустрија. Тие се поддржуваа еден со друг со години, појавувајќи се заедно на доделување награди и премиери, честопати покажувајќи колку се блиски.
Имаше и тешки моменти – неколку месеци по свадбата, Урбан доброволно започна третман за зависност од дрога и алкохол. И тој и Кидман нагласија дека борбата со зависноста дополнително ја зајакнала нивната врска.
„Верувам дека сè беше фокусирано на тој момент што нè поврза засекогаш“, рече Урбан во шоуто на Опра Винфри во 2010 година.
„Денес, кога ќе се осврнам наназад, сфаќам колку Никол ме научи, колку многу ми донесе во животот и ми ги отвори очите на безброј начини. Ова е најдобриот период од мојот живот“, додаде тој тогаш.
И покрај гласините за разделба, двојката последен пат беше видена заедно во јуни на натпревар од Светското клупско првенство на ФИФА во Нешвил, Тенеси.
Тие се појавија заедно и на наградите на Академијата за кантри музика во мај, каде што Урбан ја прими престижната награда ACM Тројна круна. Таму беа фотографирани држејќи се за раце и разменувајќи нежни бакнежи, изгледајќи заљубени како и секогаш.
Никол Кидман претходно беше во брак со актерот Том Круз. Тие беа заедно повеќе од десет години и имаат две деца. Се разведоа во 2001 година.
