„Ангелот што беше пресуден во мојот живот е мојата сопруга Ени. Средбата со неа промени сè, а резултираше со уште еден ангел – нашата Мирна. Ени ми ја покажа важноста на семејството. Кога конечно го усвоив тоа, сè друго беше лесно. Тешко е накратко да се опише што сè има Ени – таа има сè. Ме разбира на сите нивоа, со мене е и во добро и во лошо. Таа е мојата учителка, најдобра пријателка и сродна душа“, говореше Масимо Савиќ за жените кои му беа столб во животот, пишува „24 сата“.
Токму тие – неговата сопруга Ени и ќерката Мирна – на 23 декември 2022 година ја соопштија тешката вест за неговото прерано заминување.
„Нашиот татко, сопруг, гордост и љубов, Масимо Савиќ, нè напушти по кратка, но херојска борба. Иако си замина од овој свет, во нашите души ќе живее вечно – насмеан, топол, силен, исполнет со љубов и создаден од уметност. Засекогаш ќе бидеме твои девојки“, напишаа тие на социјалните мрежи.
Ени Савиќ подоцна, во интервју, искрено проговори за животот по неговата смрт: „Искрено, не живеам – само преживувам. Морам, затоа што сум мајка, тетка, сестра, кума и пријателка на оние што ме сакаат. Не смеам да им ја пренесам тагата што јас ја живеам секој ден. За жал, не е точно дека времето ги лечи сите рани. Како што минува времето, тагата и болката во мене се сè поголеми. На тоа не се навикнува, се преживува“.
Масимо Савиќ остана запаметен како еден од најголемите, највлијателните и најсаканите музичари на хрватската и регионалната сцена. Неговата кариера, обележана со исклучителен вокал, длабока емоционалност и ретка уметничка доследност, траеше речиси четири децении и остави неизбришлива трага во историјата на поп-музиката.
Роден на 6 јуни 1962 година во Пула, Савиќ уште од детството поминува низ тешки животни искуства – рана загуба на таткото, развод на родителите и чести преселби. Детството го поминува меѓу Истра, Италија и Австралија, што ќе влијае врз неговата чувствителност, интерпретација и длабочина. Поради животот во странство, повторно го учел хрватскиот јазик, а токму таа специфична дикција подоцна станала дел од неговиот препознатлив уметнички израз.
Професионалниот подем започнува со групата „Доријан Греј“, а по распадот на бендот следи исклучително успешна соло-кариера. Песните „Странац у ночи“, „Само један дан“ и „Бијег од љубави“ станаа безвременски класици.
Иако професионално исклучително успешен, Савиќ отворено зборуваше за личните падови, лошите избори и борбите од младоста. Токму средбата со Ени беше неговата животна пресвртница. Семејството и татковството му донесоа мир, стабилност и чувство на целосност.
Неговиот последен голем концерт, одржан на 5 ноември 2022 година во загрепската Арена пред повеќе од 13 илјади луѓе, остана запаметен како достоинствен и емотивен проштален чин на уметник кој до последниот здив ѝ беше верен на музиката.
Масимо Савиќ почина на 23 декември 2022 година, оставајќи зад себе богат музички опус, бројни награди и генерации публика што и денес живеат со неговите песни – како сведоштво за човек кој уметноста ја живееше искрено, длабоко и без компромис.
