Почина словачкиот режисер Јурај Јакубиско, кој беше прогласен за најдобар филмски режисер на 20 век.
Јакубиско почина синоќа на 84 години во чешкиот главен град Прага, каде што живееше со своето семејство. Тажната вест ја објави тамошното Министерство за култура.
Јакубиско има десетици долгометражни и кратки филмови кои освоија голем број награди на меѓународните филмски фестивали. За неговите филмови, полни со метафори, симболи и поезија, понекогаш го нарекуваа „Фелини од Истокот“ или „Словачки Фелини“ по славниот италијански режисер Федерико Фелини.
Овој славен режисер е роден во денешна Словачка, дипломирал на Прашката филмска школа во 1966. Дебитирал со „Круцијални години“ кој доби големи пофалби од критичарите, а голем успех имаше и со „Дезертери и аџии“ (1968) и „Птици, сираци и будали“ (1969).
Тој го освои своето место како дел од чехословачкиот нов бран во кинематографијата заедно со голем број други млади режисери од тоа време, меѓу кои и Милош Форман и Вера Хитилова.
