Откако дел од посетителите најавија колективна тужба поради организацијата на неговите концерти на стадионот „Кошево“ во Сараево, Дино Мерлин се огласи на социјалните мрежи и им се заблагодари на својата публика.
Во изминатите три вечери пејачот одржа концерти пред десетици илјади луѓе, но дел од посетителите тврдат дека, иако купиле влезници, не успеале да влезат на стадионот поради големиот метеж и затворените влезови.
Мерлин не се осврна директно на обвинувањата, туку сподели емотивна порака инспирирана од стихови од својата песна „Сито“.
„Кога мојот живот малку ќе се просее, па на врвот ќе остане она најкрупното, ќе останат овие наши… три ноќи“, напиша тој.
Потоа додаде:
„Ти благодарам, Сараево! Ти благодарам што се чувствував толку добредојдено, толку блиску до дома.“
Во меѓувреме, на социјалните мрежи се огласи и една посетителка, која тврди дека купила четири влезници од официјалниот дистрибутер, но сепак не успеала да влезе на концертот.
Според нејзините тврдења, таа и уште илјадници луѓе останале пред влезот за партерот бидејќи стадионот бил исполнет, а вратите биле затворени. Таа најави формирање група за колективна тужба против организаторот на концертот и компанијата што ги продавала билетите.
Засега нема официјална информација дали против организаторите навистина е поднесена колективна тужба.
