Српската пејачка Ана Николиќ најави голем солистички концерт во Белград, со што ги израдува своите обожаватели по подолг период со поретко појавување во јавноста. Пејачката преку својот профил на Тикток упати емотивна порака до публиката и најави дека е време повторно да настапи на големата сцена.
Нејзината објава доаѓа откако претходно во медиумите се појавија информации дека размислува да се повлече од естрадата. Сега, наместо збогување со музиката, Ана најавува концерт и порачува дека сака да им се оддолжи на верните обожаватели за поддршката што ѝ ја даваат со години.
Пејачката им се обрати на своите следбеници преку социјалните мрежи, истакнувајќи дека одамна немала поголем концерт во српската престолнина. Според неа, дошол моментот повторно да се сретне со публиката на големата сцена.
„Драги мои, сакам да ви се обратам. Толку години немам одржано некој поголем концерт во Белград. Мислам дека е време! По толку години, конечно и тоа ќе го дочекаме. Им благодарам на сите мои верни обожаватели за сите овие години. Само поради вас сум тука! Затоа, се гледаме во Арена! Ваша А.“, напишала Ана.
Со оваа порака таа најави големо музичко враќање, иако засега не се наведени конкретниот датум и другите детали за концертот.
На почетокот на месецов дел од медиумите објавија дека Ана Николиќ наводно размислува да се повлече од естрадата. Според тие информации, пејачката планирала да го подготви својот последен студиски албум, по што би следувала проштална концертна турнеја низ поголемите градови во Србија.
Во една од претходните изјави, Ана зборувала за желбата да им приреди на обожавателите големи концерти и да им се оддолжи за долгогодишната поддршка.
„Навистина ѝ должам на публиката еден голем концерт, можеби и два или три во Белград, како и големи концерти во поголемите градови. Тоа ќе биде голема турнеја, што сега ја подготвувам со новиот, следен албум, веројатно и проштален“, изјавила пејачката.
Сепак, таа тогаш оставила простор за промена на плановите, признавајќи дека нејзините одлуки понекогаш зависат и од моменталното расположение.
Ана објаснила дека тешко се замислува на сцената по педесеттата година, но истовремено признала дека често знае да се премисли и повторно да се врати на она што го сака.
„Некако не се гледам на сцената по педесеттата година, како скокам по бините и паѓам. Како што велеше баба ми: „И се валкаш по соблекувалните“. Но обично сама си противречам или публиката ме враќа. Се случува нешто, проработува инаетот во мене. Се откажувам од сè, сè ме нервира затоа што нешто не е како што сакам. Јас или работам нешто како што треба да се работи или воопшто нема да го работам. Потоа некој толку многу ќе ме испровоцира што повторно се враќам. Веројатно сум инаетлива“, раскажала пејачката.
Нејзината најнова објава повторно ги разгоре очекувањата на публиката, која сега со нетрпение ги очекува деталите за најавениот концерт во Белград.
