Триесетина хрватски писатели остро ја критикуваа одлуката на Врховниот суд на Хрватска да ја укине одлуката на сплитскиот суд од 2021 година за заедничкото старателство на Северина Вучковиќ и Милан Поповиќ над нивниот син Александар. Сега, старателството на синот го доби Милан.
„Протестираме, згрозени од одлуката на Врховниот суд на Република Хрватска да не ја почитува волјата и одлуката на дванаесетгодишниот Александар Поповиќ да живее во неговиот дом со неговата мајка Северина Вучковиќ“, изјавија писателите во писмо за поддршка кое беше објавено на социјалните мрежи.
Меѓу потписниците на писмото се и Раде Шербеџија, Борис Дежуловиќ, Анте Томиќ, Снежана Бановиќ, Еди Матиќ, Моника Херцег, Ена Халер и други писатели.
„Ги повикуваме граѓаните да покажат солидарност и емпатија кон мајката Северина Вучковиќ и нејзиниот син Александар Поповиќ. Ги повикуваме надлежните општествени институции и судови да се грижат за тоа ниту едно дете да не биде жртва на системот“, заклучуваат писателите.
