Кога нема работни обврски, пејачот Петар Грашо се труди што повеќе време да поминува во Сплит со сопругата Хана Хуљиќ и нивните деца Алба и Тони.
Грашо оваа година одлучил да направи неколку промени кои значително се одразиле на неговиот изглед – ослабел дури 13 килограми. Како успеал во тоа, откри во разговор за „IN Магазин“.
„Одлучив да исфрлам некои работи од животот – во голем процент, но не сосема. Ако кажеш никогаш, веднаш создаваш отпор. А најконзистентното што го направив е што се вратив на нешто што навистина го сакам – тренингот. Спортот. Малку тегови, малку други активности кои ме радуваат, 3–4–5 пати неделно, зависно од времето. Тоа полека станува мала зависност, па почнуваш да се вљубуваш во концептот да се чувствуваш добро во сопственото тело“, раскажува Грашо.
Кога е дома, целосно е посветен на семејството.
„Ние сме малку старомодни родители – децата сè уште не ги оставаме многу на телефони и се трудиме да ги забавуваме колку што можеме, еден на еден. Имаат, за среќа, баби и дедовци, нас… и ќе се трудиме колку што можеме да ги заштитиме од остри забци на јавноста и од детство под лупа, бидејќи се ќерка и син на Грашо и Хана, или внуче и внук на Тончо и Вјекослава Хуљиќ“, вели Петар.
Оваа година, популарниот пејач слави 30 години на музичката сцена, а најголема радост му е што може да ја сподели својата музика со публиката низ целата регија.
„Навистина сум воодушевен и бескрајно среќен што можам да ја споделам оваа емоција со луѓето. Нè поврзува една љубов, една музика што спојува – а мислам дека музиката мора да спојува, а не да разделува“, додава Грашо со насмевка.
