Американската медиумска мрежа „Си-ен-ен“ објави дека го прекинува работниот однос со познатиот водител Дон Лемон, иако тој неодамна се извини за коментарите за републиканската кандидатка за претседател на САД, Ники Хејли.
„Си-ен-ен и Дон се разделија. Дон засекогаш ќе биде дел од семејството на Си-ен-ен и му благодариме за неговиот придонес изминативе 17 години. Му посакуваме сѐ најдобро и ќе го поддржиме во неговите идни напори“, им соопшти на вработените претседателот на таа ТВ-мрежа, Крис Лихт, а писмото е објавено и на Твитер-профилот на компанијата.
Одлуката е објавена истиот ден кога соперничката американска конзервативна ТВ-мрежа „Фокс“, поради наводни „намерно изнесени лажни тврдења“ за изборите 2020 година, се раздели со својот можеби најпопуларен водител Такер Карлсон.
Лемон на Твитер-профилот на CNN прокоментира дека веста го изненадила и ја опиша како – негово отпуштање. Тој претходно се појави во неговата емисија.
Лемон предизвика општ гнев пред извесно време кога, во „Си-ен-ен утрово“, осврнувајќи се на возраста на американските политичари, рече дека 51-годишната Ники Хејли „не е во најдобрите години“. Според него тогаш, „најдобри години за една жена“ би биле 20-тите, 30-тите, а можеби и нејзините 40-ти.
Со-водителката на емисијата, Попи Харлоу побара појаснување:
– Дали мислите на најдобрите години за воспитување деца или најдобрите години за претседател на државата?
Тој продолжи со контроверзните шеги.
– Не убивај го гласникот. Јас само кажувам како стојат работите, рече Лемон, повторувајќи го истото еден час подоцна, за што доби прекори и од колешката Оди Корниш.
Лемон се извини истиот ден, велејќи дека жали за неговите „несоодветни и небитни коментари“. После тоа три дена не беше присутен во шоуто. Тој се врати следната недела.
И Ники Хејли ги критикуваше коментарите на Лемон, како сексистички. Во врска со денешната одлука, таа објави дека отпуштањето на Лемон претставува „голем ден за жените насекаде“.
— Don Lemon (@donlemon) April 24, 2023
