Музичкиот свет е во жалост бидејќи се збогува со Тито Џексон, легендарниот член на групата Џексон 5. Тој беше трето од десетте деца во светски познатото музичко семејство.
Тито Џексон почина на 70-годишна возраст.
Според долгогодишниот семеен пријател и менаџер Стив Менинг, Тито бил на пат од Ново Мексико за Оклахома кога починал во неделата, пренесува tportal.
Иако официјалната причина за смртта сè уште не е објавена, Менинг изјави за Entertainment Tonight дека верува дека Тито доживеал срцев удар.
Како постар брат на Мајкл и Џенет Џексон, Тито одигра клучна улога во подемот на семејството до славата. Во раните години тој и неговите браќа – Џеки, Џермејн, Марлон и Мајкл, се собраа за да го формираат Џексон 5, група која ќе продолжи да ја редефинира музичката сцена од доцните 60-ти и 70-ти.
Во текот на неговата кариера три пати беше номиниран за Греми награди и беше примен во Рокенрол Куќата на славните како член на Џексон 5. Соло кариерата ја започна во 2003 година, настапувајќи како блуз музичар.
