Во текот на својата долга и успешна кариера, пејачката Неда Украден постигна големи успеси на музичката сцена, но повеќепати истакнувала дека токму професионалниот подем честопати ѝ бил пречка целосно да се оствари на љубовен план.
Нејзината најголема љубов бил сопругот Милан Билбија, со кого ја добила ќерката Јелена. Сепак, помалку е познато дека по разводот Неда била длабоко вљубена во еден угледен маж, врска што оставила силна и емотивна трага во нејзиниот живот.
Со години се шпекулирало за нејзиниот љубовен живот, а иако многу мажи се обидувале да го освојат нејзиното срце, таа јавно потврдила само една врска – онаа со познатиот белградски хирург Момо Јаковљевиќ. Во тоа време, покрај лекарската кариера, тој бил активен и како манекен. Нивната љубовна приказна Неда детално ја опишала во својата автобиографија „Зора је сванула“.
„Мојот згоден и шармантен Белграѓанец го запознав на музичко-модна манифестација во Македонија, каде што двајцата настапувавме – тој како манекен, јас како пејачка. Бевме речиси на иста возраст, со пропаднати бракови зад себе. Освен што беше успешен манекен, заврши медицина и работеше како лекар. Живееше со родителите и помладиот брат во убава стара зграда на Дорќол“, напишала Неда.
Нивната врска станала сериозна во 1987 година, кога пејачката се пријавила на неговата адреса и се преселила во Белград. Како двојка често биле во центарот на вниманието, а многумина – свесно или несвесно – се обидувале да ги разделат. Семејствата добро се согласувале, но Неда во тој период сè уште била емотивно и животно врзана за Сараево.
„Бевме зрели, слободни и вљубени. Сакав да бидам не само пејачка, туку и неговата ‘обична’ девојка – да одам со неговата мајка на пазар, да готвам ручек и да подготвувам мои специјалитети, што неа особено ја радуваше“, се присетила таа.
Сепак, судбината не била наклонета кон оваа љубов. Во моментот кога животот на Неда бил поделен меѓу Белград и Сараево, се појавило клучното прашање – иднината на нејзината ќерка Јелена, која требало да тргне во прво одделение.
„Знаев дека преселбата, промената на средината, училиштето, јазикот и животот без баба, дедо, татко и останатото семејство не се нешто што моето дете би го прифатило. Во едно бев сигурна – не сакав таа да страда поради моите одлуки. Затоа одлучив јас да страдам. И страдав… долго“, искрено признала Неда.
Да потсетиме, Момо Јаковљевиќ е угледен хирург, лекар на кошаркарската репрезентација на Србија и помошник-директор на Клиничко-болничкиот центар „Д-р Драгиша Мишовиќ“. Во едно од ретките јавни појавувања открил дека се оженил дури во четириесеттата година и дека има син и две ќерки. За својата професија изјавил дека никогаш не планира пензионирање и дека верува оти најважно е зад човекот да останат дела.
Неда Украден имала еден брак, но и бројни додворувачи и бурни врски. Во текот на целата кариера важела за голема заводничка и фатална жена. Во брак била со Милан Билбија, кого го запознала на 19 години. По десет години врска се венчале, ја добиле ќерката Јелена и во брак биле три години, но до неговата смрт во 2013 година останале во добри односи.
