Модната дизајнерка Мелина Џиновиќ повторно е во фокусот на јавноста, откако неодамна се омажи за британскиот бизнисмен Џефри Пол Арнолд Деј во Монако, а прославата продолжи во Италија.
Додека на социјалните мрежи се водат дебати за нејзиниот приватен живот, малкумина знаат дека Џиновиќ имала сериозен академски пат пред да се посвети на семејството.
Таа е родена во Бихаќ во 1982 година, а подоцна се преселила во Загреб, каде што го завршила основното и средното образование. Потоа се запишала на Филолошкиот факултет при Универзитетот во Загреб, на насоката англиски јазик и лингвистика.
Како студентка важела за одлична, а испитите ги полагала со леснотија. До 2002 година веќе била апсолвент, односно пред самиот крај на студиите.
Сепак, токму тогаш донела одлука да го прекине образованието и да стапи во брак со пејачот Харис Џиновиќ, кој е значително постар од неа.
Оваа одлука предизвикала несогласувања во нејзиното семејство, кое не ја поддржувало идејата да се напушти факултетот непосредно пред дипломирање.
„Го оставив факултетот во четврта година и не зажалив. Мајка ми постојано ми велеше дека мора да дипломирам, но јас не го направив тоа. Тоа не е совет за другите, бидејќи е голема штета да се напушти факултет пред крај“, изјавила таа во едно интервју.
И покрај тоа што не го завршила факултетот, Мелина Џиновиќ подоцна изгради успешна кариера во модната индустрија.
