Пејачот и рапер Арон Картер кој почина пред неколку месеци се удавил во када, а бил онесвестен од седативи што ги земал и гас користен во спрејовите за чистење што ги вдишувал, се вели во извештајот на патологот објавен денеска, пренесува Гардијан.
Картер имаше 34 години, беше пронајден мртов на 5 ноември лани во кадата на неговиот дом во Ланкастер, Калифорнија.
Во извештајот од обдукцијата се вели дека седативот алпразолам, кој често се продава под брендот „Ксанакс“, бил пронајден во неговото тело како и компримиран гас дифлуороетан, кој најчесто се користел во средствата за чистење со спреј и „може да предизвика седација и еуфорија при вдишување.“
Овие две супстанци го онесвестиле младиот пејач поради што се удавил во кадата, пишува Гардијан.
Картер се прослави како дете-ѕвезда со хитовите како „I Want Candy“ и „That’s How I Beat Shaq“, а беше познат и по тоа што беше помлад брат на Ник Картер, член на групата „Бекстрит бојс“.
