Со топлото и сончево време, и подолгиот престој во природа, луѓето почесто доаѓаат во контакт со крлежите, кои во овој период од годината ги има повеќе од вообичаено.
Околу 60 отсто од крлежите, кои се закачуваат за кожата на човекот, пренесуваат зарази, од бактерии и вируси, до посериозни инфекции како што е Лајмска болест. На оние кои сами ги отстрануваат крлежите (иако не се препорачува сами да го прават тоа), им се советува да ги однесат на анализа, за да бидат сигурни дали крлежот е заразен или не. Отстранувањето на крлежот треба да се изврши на ниво на примарна здравствена заштита, како и иницијално следење на пациентите.
Мерки во здравствена установа – како да се отстрани стерилно крлеж од кожата
Самиот крлеж, како и подрачјето околу него, пред отстранувањето не се чистат и особено не се премачкуваат со алкохол, етер, масла, сапуница и други средства.
Процедурата е следна:
– Здравствениот работник по миењето на рацете става ракавици за еднократна употреба.
– Зема стерилна пинцета.
– Го фаќа крлежот што е можно поблиску до површината на кожата за главата.
– Со рамномерно и лесно влечење го отстранува крлежот (вртење, тегнење, поместување на крлежот во која било насока само го зголемува ризикот од кинење и останување на дел од пипалата и главата на крлежот во телото на повредениот).
– По отстранувањето на крлежот, местото се чисти со раствор од алкохол.
– Можно е крлежот да се однесе на микробиолошки преглед – во некои ветеринарни установи и ординации.
– Да му се објасни на пациентот дека во натамошниот тек не се даваат лекови (особено не антибиотици за краток период од 3-7 дена, како што честопати се советува).
– Потребно е да се набљудува местото на убодот, и ако во период од 5-30 дена се јави тркалезен црвен печат со дијаметар над 5 см, тогаш е неопходно пациентот да се јави кај надлежен инфектолог за утврдување на терапијата.
– Во случај да нема промени на кожата по еден месец, може да се направи серолошкото испитување со ЕЛИСА тест на ИгМ и ИгГ антитела.
– Во случај на позитивен наод (ИгМ), може да се даде терапија со доксициклин 2х100 мг за возрасни, или амоксицилин за деца во траење од 21 ден или пациентот може да се упати на инфектолог.
Само во случај на појава на симптоматологија или потреба од консултации, пациентот треба да се упати на повисоко ниво на здравствена заштита. Особено е потребно да се обезбеди работа на службата во текот на ноќта, неработните денови, викендите и празниците, бидејќи тогаш инциденцата на јавување на пациенти убодени од крлеж е поголема. (враќање од природа, излети заради неработни денови…).
Во текот на пролетта и летото, сите треба да избегнуваат престој во висока трева на неуредни површини за да ја намалат можноста да им се „закачи“ крлеж.
